Dil pe hairat ne ajab rang jama rakha hai, ek uljhi hui tasweer bana rakha hai
kuch samjah mein nahi aata ki ye chakkar kya hai, khail kya tum ne azal se racha rakha hai
rooh ki jism ke pinjre ka ban kar qaidee us pe phir mout ka pehraa bhi bitha rakha hai
de ke tadbeer ke panchi ko udane tum ne, daam-e-tadbeer mein har samt bicha rakha hai
Ye bhalai wo burai, ye jahannum, wo bahisht; is ulat phern mein farmao to kya rakha hai
kar ke araaish-e-quonain ki barson tum ne, khatm karne ka bhee mansooba bana rakha hai
de ke insaan ko dunia mein khilafat apni, ek tamasha sa zamane mein bana rakha hai
jurm aadam ne kiya aur saza baetoN ko, adl-o-insaaf ka mai’yaar bhee kya rakha hai
apni pehchaan ki khaatir hai banaya sab ki, sab ki nazroon se magar khud ko chipa rakha hai
Nit naye naqsh banate ho mita dete ho, jane kis jurm-e-tamanna ki saza dete ho
kabhi kankar ko bana dete ho heere ki kani, kabhee herooN ko bhee mitti mein mila dete ho
apni hasti bhee wo ek roz gawa baith-ta hai, apne darshan ki lagan jis ko laga dete ho
Zindagi kitne hee murdoN ko ata ki jis ne, wo maseeha bhee saleeboN pe saja dete ho
khwahish-e-deed jo kar baithe sir-e-tuur koi, tuur hee bark e tajaali se jala dete ho
nala-e-namrood mein dalwate ho qudrat na khaleeq, khud hee phir naar ko gulzaar bana dete ho
chahe ki aan mein phaikoN kabhee mah-e-kinaan, noor Yaqoob ki aankhoN ka bujha dete ho
de ke Yusuf ko kabhee misr ke baazaaron mein, aakhir kar shah-e-misr bana dete ho
jazb-o-masti ki jo manzil pe pahunchta hai koi, baith ke dil mein anal haq ki sada dete ho
khud hee lagwate ho phir kufr ke fatwe us par, khud hee mansoor ko sooli pe chadha dete ho
Koi raanjha jo kabhee khoj mein nikle tum ko, tum use jhang ke mele min rula dete ho
justju lay ke tumhari jo chale qais koi, us ko majnoo kisi laila ka bana dete ho
jot sassi ki agar munh mein tumhari jage, tum use tapte hue thaal mein jala dete ho
sohni gar tum ko mahiwaal tasawur kar le, us ko bikhri hui lehroN mein baha dete ho
khud jo chaho to sar-e-arsh bula kar mehboob, ek hee raat mein mairaaj kara dete ho
raah-e-tahqueek mein har gaam pe uljhan dekhuN, wohi haalat-o-khayalaat mein anban dekhun
bana ke reh jaata hoon tasweer pareshaani ki, gaur se jab bhee kabhi dunia ke darpan dekhun
ek hee khaak pe fitrat ke tajadaat itne, itne hisson main banta ek hee aangan dekhun
khuN rulata hai ye tasqeem ka andaz mujhe, koi dhanwaan yahan par koi nirdhan dekhun
kahin pukarte-dariya kabhi khamoosh pahar, kabhi jungle kahiN sehra, kahiN gulshan dekhun
phool murjhaaye hue hain kahiN sachchai ke, aur kahiN Jhooth ke kaatoN pe bhee joban dekhuN
shams ki khaal kahin khichti nazar aati hai, kahee sarmad ki utarti hui gardan dekhun
raat kya shai hai, sawera kya hai, ye ujala ye andhera kya hai
main bhee nayab hoon tumhara aakhir, kyoN ye kehte ho ki tera kya hai
jo karta huN mana, tumhe lagta hai bura sa, phir bhee hai mujhe tum se bar-haal gila sa
chup chaap raahe dikhaate tum arsh-e-bareeN par, tapte hote karbal mein mohammad ka nawasa
kis tarah pilata tha lahu apna wafa ko khud teen dino se wo agarche tha pyasaa
dushman to baahar taur thaey dushman magar afsos, tum ne bhee faraham na kiya paani zara sa
har zulm ki taufeeq hai zaalim ki virasaat, mazloom ke hisse mein tassali na dilasa
kal taaj saja dikha tha jis shaqs ke sar par, hai aaj usi shaqs ke haathon mein hikasaa
ye kya hai agar puchun to kehte ho jawaban, is raaz se ho sakta nahi koi shanasa
dil se armaan jo nikal jaye to jugnu ho jaye aur aankhon mein simat aaye to aanson ho jaye
jaN pe ya huu ka jo be hu kare hu mein kho kar se, us ko sultaniyaan mil jaye wo baahu jo jaye
baalgi ka na kisi ka ho churi ke neeche, halq-e-asghar mein kabhee teer tarazu ho jaye
markaz-e-justju aalam-e-rang-o-boo, dum-ba-dum jalwagar, tu he tu chaar su
ho ke mahaul mein kuch nahi, illaah hu, tum bohot dilruba tum bohut khoobaru
arsh ki azmateN farsh ki aabru, tum ho qou-nein ka haasil-e-aarzoo
aankh ne kar liya aanNsuoN se wazu, ab to kar do aata deed ka ek sabu
aao parde se tum aankh ke ru-ba-ru, chand lamhe milan do ghari guftagu
naaz japta phire jaN- ba-jaN qu-ba-qu, wada hu wada hu la shareeka la hu
-Naaz Khialvi
नाज़ को यहीं सुना आपके ब्लॉग पर! इस ब्लॉग की सब्सक्रिप्शन ने नायाब चीजें दीं मुझे। शुक्रिया।
स्वागत।